絲絲講場：盧比狂瀉關星象事？
「金磚四國」之父奧尼爾，早幾日話除咗中國之外，印度、巴西及俄羅斯呢三舊磚，已失去光環，老竇都唔認你，你話幾悽慘呢？
好似印度咁，佢哋嘅貨幣盧比今年以嚟已經跌咗成17%，經濟學家唔buy佢哋，有數唔盡嘅理由，但印度術士話，係因為一○年先至推出嘅盧比新符號「唔吉利」，而且實行新符號嗰日撞正星象不祥！
中間一橫似刀割喉
呢類印度術士，其實同中國嘅風水師差唔多，絲絲聽講，個印度術士就話新符號開始實行嗰一日星象不祥，搞到盧比冇「眾星守護」。
唔單止係咁，佢仲話盧比個符號中間有一橫就好似一把刀割開人嘅喉嚨咁，所以新符號推出後，盧比就不斷貶值，目前唯一解決方法就係換個吉祥嘅符號！
信唔信得過？絲絲唔敢否定，但其他金磚國以至新興市場，佢哋嘅貨幣冇變過，除咗各自嘅經濟原因不同外，股匯表現都主要係受美國退市拖累。
余詩韻