股神巴菲特開局，佢投資旗艦巴郡邊位員工估中今年NCAA全美大學籃球賽出線全局，就終身每年送佢100萬美元（約780萬港元），幾乎養佢一世。
每年一到三月，全美國都會為NCAA癲晒，有「瘋狂三月（March Madness）」之稱，仲爆過NBA美國職業籃球賽。個NCAA委員會會先由全美300幾支球隊遴選出68支，進入分組賽，打7個Round，睇邊隊最後勝出。
想股神養過世，就要估中晒68支隊伍出線對疊全局。若然最終奪標嘅係股神家鄉內布拉斯加州嘅隊伍，獎金雙計，估中全局可年袋200萬美元，直至終老。
有幾難？就咁嘅，有數學家計過，六十幾隊，至少有900萬個萬億嘅組合，即係900萬嘅三次方，換言之係一個9後面有18個零！怕且難中過六合彩。
不過咁，唔全中亦有安慰獎，股神會送出一筆過10萬美元獎金畀估得最貼近嘅員工。
股神一四年首次開NCAA局，當時仲公開畀公眾參與，獎金係10億美元添！結果？舊年有人估中首32場賽果。
查實估中嘅機率，股神早就搵旗下嘅保險精算師計過晒數。
余絲韻