絲絲講場：10萬部小米 分半鐘搶光
有「雷布斯」之稱嘅雷軍，喺內地有大批擁躉，每次小米科技有新產品上市，必然引發「米粉」嘅搶購潮，好似尋日小米發售嘅小米3手機同小米電視更加係畀買家「秒殺」，首批10萬部小米3喺開售後1分26秒內就被搶購一空。
內地市佔贏iPhone
而3,000部小米電視，雖然淨係開放北京、上海等七個城市預購，但最後一樣喺唔夠兩分鐘內就售罄。
小米近年氣勢如虹，靠用「蔗渣價錢」賣高檔智能手機成功突圍，小米手機今年第二季喺內地嘅市佔率已經去到5%，市場排名超越iPhone，仲追近三星同聯想。
尋日發售嘅小米3分16GB同64GB兩個版本，分別賣1,999元（人民幣‧下同）同2,499元，有死忠米粉話，未到十二點已經上網準備搶購，可惜網絡大塞車，喺嗰重要嘅分半鐘根本上唔到官方網站。
炒機嘅黃牛話，手上已經收到大量預付款，依家係「客多貨少」，而淘寶網尋日嘅報價，小米3同小米電視嘅售價全部比官方高出1,000蚊左右，以16GB小米3嚟計，加幅有成五成，不過仍然有唔少「米粉」話有興趣喎。而喺首批產品極速售罄後，小米亦都即時追加供貨，預告第二批產品會喺廿二號發售。
余詩韻