角逐影后周秀娜不再心虛：我係演員！
模特兒出身的周秀娜（Chrissie）入行十年，早前憑電影《29+1》首獲金像獎「最佳女主角」提名。她受訪時坦言，收到消息一刻難以置信：「第一個反應呆咗，覺得好似有好多馬匹喺個心度奔騰緊，但又要按捺住，因為咁啱坐緊車，唔想嚇親司機哥哥。」
好友留言感觸良多
入圍消息傳出後，Chrissie收到大量恭賀短訊，當中一班認識十多年的好友留言，更令她「崩堤」嚎哭，Chrissie說：「呢班朋友陪住我成長，咁多年我有電影上都會叫佢哋去睇、畀意見，佢哋知道我入圍仲開心過我，其中一句『見到你咁多年不斷嘅努力……』」說到此處，她登時再度眼濕濕，坦言感受良多：「呢句說話令我即刻喊，入行咁多年，我明白能夠得到別人嘅認同，係一件非常艱辛嘅事！如今我終於可以達成夢想，得到觀眾嘅認同，唔使再心虛，可以大聲咁講句：『我係演員！』」
讚鄧麗欣實至名歸
今年金像獎影后之爭相當激烈，面對着影后級的毛舜筠、周迅、張艾嘉及剛獲電影評論學會最佳女演員的鄧麗欣，Chrissie以欣賞角度去談論對手：「我本身好喜歡毛舜筠同周迅，張艾嘉演戲好叻，仲做埋導演，係一個好好嘅榜樣。至於鄧麗欣，我同佢合作過，佢之前攞評論學會影后，我都第一時間恭喜佢，覺得佢實至名歸！」她直言今次能同一班好戲之人一齊入圍已「贏咗」，不會多想能得獎與否，亦不會畀壓力自己。
文：影視組
攝：劉智源
場地：Oyster Manner（Barry@relaxdearhk）
Stylist：Harry Lam Wardrobe：Versace