凌文龍街頭「練戲」被歧視
影星毛舜筠及凌文龍合作拍戲產生化學作用，凌文龍更入圍本屆金像獎影帝及新演員，他感激毛舜筠「搭路」，原來當初毛舜筠「慧眼識新人」，睇過凌文龍的舞台劇演出，即將他引薦給導演。談到戲中扮演自閉兒，凌文龍坦言下了不少苦功：「原以為佢哋愛匿埋，但原來好活躍，試過喺街『練戲』，被人投以奇異眼光。」
其中一場戲，凌文龍要用力將頭撞埋牆，毛舜筠即伸手「按住」，毛舜筠形容自己如參加完摔角賽：「另外有場戲講佢喺街走失咗，我好投入，事關我細女都曾經走失過，當時我諗如果佢衝咗出馬路點算。」電影開拍前，二人曾被安排家訪「攞料」，毛舜筠說：「我聽到個家長話試過唔見咗個仔，緊張到仆損晒，又見到啲片入面患者大力拍打自己，搞到嘴角流晒血……聽到個心好傷，希望大家可以有多啲同理心。」