前TVBI員工Simon被揭向無綫藝人借錢唔還，涉及「苦主」陸續浮面逾20人，Simon昨日「蒲頭」否認是騙徒，更揚言至今沒有藝人追他還錢。林夏薇直斥對方利用她的同情心，並公開當日他借錢聲帶，而林盛斌（Bob）亦表示曾3度借錢給對方，總數幾萬蚊冇回頭，而陸詩韻則自爆險中招。
無綫導演Eddie近日爆料，指前TVBI員工Simon自2009年開始向他借錢，總數共13萬元，惟對方久未清還，日前他終報警求助。事件曝光後，陸續有藝人表示有收過對方借錢請求，包括林夏薇、莊思明、唐詩詠、陳敏之、陸詩韻、林盛斌、劉思希等，當中不幸中招藝人更至今仍未收到還款。
對於捲入借錢不還風波，潛了水的Simon昨日終「蒲頭」受訪，坦承因經濟問題曾先後向多位藝人朋友借錢，但強調自己並非偷呃拐騙的騙徒，並感謝助他紓困的藝人朋友。問到為何不還錢？他說：「我個電話一路都冇改過，Eddie冇聯絡過亦冇追我，受害人可以心平氣和同我傾。（佢報咗警！）咁有冇受理到？有文件、證據可以攞出嚟。（唔主動聯絡『債主』？）換電話時好多電話冇咗，我同佢哋有個deal，話環境許可就會還錢，依家冇一個藝人追過我錢，咁我何謂騙徒？我唔係一個借錢唔還嘅人。」問到到底涉款多少？他則自言不超過20萬元。
而借出3,000元的林夏薇，對於Simon揚言「冇人追佢數」非常憤怒，她說：「佢舊年話11月等份保險拎番錢就會還畀我，到時再問我戶口號碼，當然到期都冇提過啦！利用我同情心冇咩好講，冇同佢deal過任何嘢，總之借錢就一定要還，我可以等佢還晒畀Eddie呢啲大數先，再還畀我都得。」至於「最強苦主」Eddie亦說：「搵過佢好多次，但2019年搵完之後冇再搵，覺得佢推三推四、毫無誠意同無賴，再搵佢佢都依然繼續拖（數），有誠意係咪應該主動搵人，用真誠方法去還錢。」
另外，Bob昨日亦透露先後借幾萬元給對方解困：「上年1月借過2次，3月再借過，總共3次，佢有講過還錢方法，但最終冇兌現，我亦冇再聯絡佢。（唔追？）諗住畀啲時間佢慢慢還。」而陸詩韻則晒出對話截圖，自言險中招：「佢上年9月有問過我借，其實唔係太熟，所以冇借到。」劉思希則表示近日收到對方借錢短訊：「前2日先收到問我借1萬蚊，有諗過借，但藝人朋友一聽佢個名即刻叫我千祈唔好。」