繼續撐！傑志唔赦天津權健

港超球隊傑志繼上月中主場憑鄭展龍射入絕殺球，1比0小勝去季日職殿軍柏雷素爾後，今晚重返亞冠戰場出戰E組分組賽，於旺角大球場迎戰上季中超季軍天津權健。雖然艾里奧及列斯奧一對中堅均告倦勤，但「藍鳥」主教練朱志光仍希望在主場球迷支持下藍海再現，一眾球員能夠多走一步，打出漂亮一仗。（Now 633周三晚8時直播）

傑志王牌科蘭

目前以3分處E組末席的傑志，今晚出戰最後一場主場分組賽，而最後一輪則在兩周後作客全北汽車。主教練朱志光表示︰「我哋喺主場贏得首勝，成隊波信心都提升，但嚟緊呢場，我哋一對亞冠中路守將同時受傷，因此可能會出現一個新組合，希望無論邊個球員踢都好，比賽喺針對性上落多啲工夫，希望喺主場借助球迷支持，打得好啲。」

李毅凱孭飛打中堅

「朱Sir」續道，今仗會安排守將李毅凱出任中堅，並藉比賽觀察他的能力水平︰「我要選用一個過去兩場亞冠打得唔錯嘅球員作為替補，李毅凱將會取代其中一個位置，佢用波能力好高，紀律性好強，希望佢有正常發揮，經過上一場贏波後，今場再考驗佢嘅能力。」

於中超錄得3連敗的天津權健，隊中的前巴西國腳柏圖、比利時國腳中場韋素及法國中鋒莫迪斯迪均有隨隊來港，球隊周一晚抵港後，昨晚於旺角大球場進行賽前唯一一課操練，主教練保羅蘇沙向傑志大送高帽︰「我預計今場比賽會係場硬仗，對手傑志喺比賽中不斷成長，近兩場亞冠表現出色，佢哋控制戰局方面做得好好。我已經同球員講過，對手主場贏波後，雙方唔可以再用上場交手表現預測戰果，不過希望今場可以同樣擊敗對手，假若贏波能令球隊喺分組賽踏出一大步。」至於前巴西國腳柏圖則表示，個人沒有特別留意傑志個別球員，因對手所有球員均需要注意，並希望為球會創造歷史。