金雅斌性感爆發

增強自信

出生於南韓首爾嘅金雅斌，最初並冇諗過喺模特兒界發展，反而希望從事市場推廣工作。不過擁有迷人樣貌及火辣身材嘅佢，卻經常被人力邀加入模特兒界，起初佢並唔係咁願意，最多喺平面廣告上客串。隨住佢接觸模特兒嘅機會愈嚟愈多，開始對呢份工作產生興趣，及至2014年終於作出一個重大嘅決定，就係成為一位職業平面模特兒。大家冇睇錯，佢最初係以平面模特兒身份登場，據講由於當時佢害怕面對群眾關係，故此並冇打算成為車模。優雅氣質之中帶有野性美嘅雅斌，好快就喺業界打響名堂，並先後為多本時裝、化妝品及電子產品雜誌拍攝照片。慢慢建立起自信，佢覺得係時候朝住車模界進發，於是喺2015年轉投車模行列，而首個演出更係以賽車女郎身份於電單車錦標賽上亮相。大家咪以為呢種決定好容易，雖然佢已累積豐富嘅模特兒演出經驗，但面對群眾時仍然覺得相當緊張，佢坦言轉型做車模前，係一個非常艱難嘅決定，但係為咗事業有新突破，所以唔會感到後悔。事實上，喺佢首次賽車女郎演出中，不但備受好評，其火辣身材更係成為全場焦點。呢次成功嘅演出對佢嚟講係一個極大嘅鼓舞，為佢日後嘅模特兒事業打下強心針。

放假勁食

可以話係一戰成名嘅金雅斌，之後喺多個車展及賽車比賽上登場，表現愈嚟愈熟練，舉手投足都係散發出令人心動嘅魅力。為咗令人氣進一步提升，佢改行性感路線，尤其係深長嘅事業線，成為迷倒一眾攝影師嘅利器。與此同時，佢先後拍攝咗多輯寫真，將性感演繹得淋漓盡致。有人問佢既然人氣咁高，點解仲要走性感路線呢？佢解釋有兩個理由，第一係既然擁有迷人身段，梗係要展現畀大家欣賞，第二係行性感而非暴露，一啲都唔覺得咁樣會影響形象。事實上，性感大爆發後嘅佢，人氣比以前更高，演出機會亦大大增加。不過每次辛苦工作兩個月，佢都會申請放一個月假休息，唔通人紅咗之後就吊高嚟賣？實情係佢唔想因為繁重嘅工作而令影響健康。的確，唔少車模隨住人氣不斷提升，身體卻承受唔到密密麻麻嘅工作量，結果病倒需要停工休養。咁唔知阿妹喺休息期間會做啲乜呢？佢表示最大嘅樂趣就係食嘢，因為平時需要長時間工作，又怕食得太多會凸個肚腩出嚟，所以唔敢食得多，因此趁放假要好好食一餐。雖然可以放任咁食，但佢仍然唔敢食得太過分，而佢嘅安排係勁食一個星期，其餘3個星期則努力做運動Keep Fit。放假都冇得抖，女神真係唔易做呀！

精彩推介

簡介：金雅斌嘅氣質相當特別，優雅得嚟內藏一種誘人嘅野性美，尤其係以性感造型登場時，呢兩種迷人氣質更會盡情發放，叫人點可能唔畀佢打動到呢？而講到飲飲食食，可謂佢嘅強項，有興趣嘅話，不妨睇吓佢喺IG分享嘅食經，一定會引到大家流晒口水。

網址：https://www.instagram.com/kab_love1004/

金雅斌Profile

出生地：首爾

身高：170cm

三圍：35、24、34

撰文：魂