冇得落場掀「還我耀富」風暴 黃耀富:仲有人想睇我!

自稱「Fu Dragon」嘅黃耀富,平時畀人印象「口不擇言、生活複雜」、甚至「唔慌好人」;但36歲嘅佢仍留喺球場,全因有一個以身作則、偉大到你唔信傳承下一代嘅使命!曾經「複雜」回歸「簡單」,呢位「夢想FC話題王」今季落場時間,同其人氣成反比,引嚟球迷高呼「還我耀富」,令「Fu Dragon」感慨咁話:「起碼仲有人想睇我踢波,捱都捱得有價值!」

球員生涯贏過銀牌錦標,輝煌過,又試過心灰轉行做珠寶、運輸、海鮮等十幾個行業,亦試過每月自費買港會會籍踢乙組……唯一無變係「富仔」每次落場都係最搏命一人,到36歲都無變過:「我就係唔鍾意輸!你好波過我、想扭我,即使踢跌你都唔可以畀你過!我好想用『身教』話畀新一輩知呢份鬥心,就算練波亦要吓吓飛到盡先叫認真!尤其近幾年做埋香港5人足球代表隊教練,身份唔同咗,就更加想做多啲嘢!」

借「複雜」經歷告誡後輩

黃耀富外形畀人覺得佢「品流複雜」,「Fu Dragon」自有一番見解:「我好想告誡年輕球員,如果你一旦掂上『複雜嘢』,就返唔到轉頭!以前我都試過『複雜』,就係咁先知可以好大鑊,但你依家同班細嘅講係無用,尤其球員呢行好容易掂到『複雜嘢』,惟有不停咁灌輸佢哋『踢好啲波自然有錢,有錢你退休後想玩乜都得』!等佢哋退休時就會成熟,亦唔會誤入歧途!」不過「富仔」強調自己「複雜」已經係以前嘅事,依家生活只有教波、踢波同拍嘢,就係咁「簡單」!

希望新一輩「輸在起跑線」

「富仔」同時亦希望新一輩球員「輸在起跑線」:「依家嘅後生仔所有嘢都太易得到,港青甚至港隊話踢就踢,但條路太順,遇到失敗就承受唔到!我自己身世坎坷,反而磨練到唔服輸嘅性格,造就好似『小強』咁嘅生命力!」

夢想FC重用年輕球員,「富仔」講笑話部分隊友「好命嘅做到佢老竇」,亦正正係咁令佢出場時間驟減:「我梗係想踢,冇得踢當然唔開心!但換轉我係細榮(夢想FC教練梁志榮),我都會畀多啲機會年輕球員!我能夠做嘅就係默默咁練波,做好準備等出場,有時候我喺場邊聽到球迷叫『還我耀富』,雖然唔知係真心定假意,起碼仲有人想睇我……倒轉講如果冇人記得我嘅時候,就必須離開!」

圖、文:司徒子文