騎士搶閘入季後賽
騎士成為首支鎖定季後賽席位球隊！「大帝」勒邦占士因傷休戰兩場後，尋日作客面對76人終告復出，結果佢亦冇令球迷失望，攻入23分及交出10次助攻，協助騎士以100比95贏波。騎士總成績51勝15負，成為今季首支鎖定季後賽席位的球隊。
「大帝」因為右足踝受傷休息咗兩場，尋日回歸正選行列，可惜輪到占美臣因膝傷缺陣，不過由於對手76人實力較弱，所以騎士亦能輕鬆過關。「大帝」貢獻23分及10次助攻，另搶下６個籃板球及３次封阻，數據好全面。
大帝賽後話：「今場我明顯未能適應比賽節奏，但慶幸已傷愈回歸賽場，我認為我哋贏在防守出色。」
湖人險勝鳳凰城
至於同騎士爭緊聯盟一哥嘅湖人，同日作客以102比96險勝鳳凰城太陽。湖人今場勝在表現平均，五位正選球員都獲得雙位數字得分，其中高比拜仁射入21分及搶得10個籃板球，係全隊最高。向來得分能力極強嘅鳳凰城，今場罕有地得分唔過百，原來球隊近21次得分唔過百嘅話，有20次都輸波，可見鳳凰城唔過百就多數冇運行。
本報綜合報道