韋迪着火炒巫師

奧尼爾同香妮喺○二年拆禮物日結婚，捱唔到「七年之癢」，其實奧尼爾喺兩年前曾申請過離婚，話老婆香妮水性楊花，周圍勾佬，但面對巨額賠償，奧尼爾最終都決定讓步，點知事隔兩年，輪到香妮發難，主動要求離婚及子女撫養權。

至於奧尼爾嘅宿敵杜域侯活亦惹上麻煩，佢早前喺自己個blog度大鬧球證，結果被聯盟判罰一萬五千美金。侯活喺上周六對活塞嘅賽事中，上陣十六分鐘就六犯離場，咁又難怪佢咁躁嘅！

此外，尋日各場NBA賽事中，最開心都算係帝王喇，佢哋主場以一○一比九十八擊敗雷霆，三年來首次勝率過五成，都算飲得杯落喇。而熱火主將韋迪尋日亦大發神威，獨取四十一分，帶領熱火贏巫師九十比七十六。