衞冕總冠軍湖人聽日主場如臨大敵，惡鬥狀態正盛嘅鳳凰城太陽，爆發西岸榜首大戰。湖人近期飽受傷兵困擾，最慘係傷親嘅都係內線球員，「雙塔」加素、拜林仲未傷愈，而替補嘅中鋒DJ班加亦被積遜教練指「周身傷」！內線力薄弱之下，鳳凰城有力恃勇斬殺湖人。

（now 671周五早上11時30分直播）

湖人中鋒位「重傷」

湖人近期似乎「冇拜神」，內線球員輪住咁傷，中鋒加素因為右腿筋拉傷，一直都未能復出。及後就到拜林，佢因為右肘傷勢，同樣要休息，所以湖人迫於無奈任用剛果中鋒DJ班加打正選。但原來呢位仁兄同樣係「紮住上」，賽前積遜教練指佢飽受腹股溝困擾之餘，膝部亦患有肌腱炎，所以在發力上有一定影響。湖人咁唔齊章，肯定影響戰力。

相反鳳凰城嘅人腳就齊整得多，今場可以「夫添」上陣，而多位主力如拿殊、格蘭希爾及史杜達米亞亦鹹魚翻生，尤其拿殊連番交出驚人助攻數據，論狀態及人腳，此刻嘅鳳凰城唔會在湖人之下。再者鳳凰城開咧成績突出，獲得7勝1負嘅史上最佳開局，小球威力全面回歸，湖人肯定惡打。