開講有話，唔怕唔識貨，最怕貨比貨。雙非問題困擾香港多年，特衰政府一直唔嗲唔吊，直至候任特首梁振英果斷出招，跛腳鴨先至跪低，呢啲咪就係強政勵治同廢柴治港嘅分別囉。
梁振英一錘定音，解決咗一個大問題，自然贏來一片掌聲。正如香港產科服務關注組召集人梁德揚話齋，梁振英出招打破產子業泡沫，的確值得稱讚。佢話吖，過去多次向當局提出雙非問題，但官員只懂閉門造車，拖拖拉拉，相信梁振英提出零配額後，產科及其他醫療服務將會重回正軌。
冇錯嘞，當斷不斷，必受其亂吖嘛，雙非問題愈來愈失控，就係跛腳鴨政府拖出來嘅惡果。鬼咩，上樑不正下樑歪，煲呔曾敷衍塞責，其他高官有樣學樣，一個二個胡混度日，根本冇心機做好呢份工，結果咪搞到七國咁亂囉。呢，短短幾年之嘛，雙非嬰兒就由每年幾百人，增加到家陣每年四萬幾人；衝急症室產子個案，更由前年幾百宗，暴升至去年逾一千六百宗。面對咁嘅亂局，煲呔曾政府仲喺度側側膊，一味以所謂行政措施虛應故事，簡直九唔搭八。
老實講吖，如果行政措施可以止到咳，就唔使咁狼狽喇。嗱，尋日又有一位雙非孕婦中介人被法庭判刑，案情指被告過去幾年曾多次陪雙非孕婦來港產子，自稱為孕婦做翻譯喎。日前佢食過翻尋味，再陪孕婦來港時被捕，卒之承認四項違反逗留條件罪，被判監禁十一個星期。正所謂，蝕本生意冇人做，殺頭生意有人做，今次已經係兩個月嚟第三宗雙非中介人被檢控個案，證明中介人成行成市，所謂行政措施完全係廢嘅。
講到底，雙非問題係跛腳鴨政府一手造成，梁振英果斷出手，撥亂反正，兜口兜面摑咗佢哋一巴，可以講係人心大快，大快人心。最好笑係，煲呔曾及周一嶽呢啲廢柴官僚仲死撐，一個聲稱雙非零配額係兩屆政府商討嘅成果，一個就話全靠自己主動向梁振英提出雙非問題喎，面皮仲厚過電話簿，簡直唔知醜字點寫。
話時話，曾蔭權禍港七年，遺下嘅爛攤子不計其數，雙非問題只不過係冰山一角嘅咋。新舊政府交接在即，梁振英同夕陽政府劃清界線，喝停雙非無疑係行啱咗第一步，但咁仲未夠㗎，下屆政府要真正實現「穩中求變、適度有為」嘅施政理念，必須徹底整頓吏治，最重要係叮走庸官，唔好再畀啲廢物留喺度害人害物喇！