特首候選人唐英年（唐唐）畀傳媒踢爆僭建二千多呎大宅地牢後，民望直插谷底。有份提名唐唐嘅全國政協李大壯，尋日就喺分屬「唐營」嘅經濟動力立法會議員林健鋒陪同下參觀添馬艦立法會新大樓。李大壯畀人問到唐唐僭建又有緋聞，仲有冇得救？佢就話︰「有冇得救？唔知喎，我又唔係醫生！」
李大壯參觀立法會時被記者重重包圍，事關唐唐被揭發僭建大宅地牢後，曾經用調虎離山之計，靜雞雞去咗中聯辦，咁啱李大壯早前亦去過中聯辦，真係巧合。大家於是問李大壯係唔係去中聯辦幫唐唐求情啦，點知佢話︰「你查清楚啲fact（事實）先啦！」否認係為唐唐去講好說話。
大家都好有興趣想知唐唐最後會否退選，於是又問下李大壯，點知李大壯就話︰「有冇得救﹖唔知喎，我又唔係醫生！」跟住就笑笑口走咗去。