煲呔曾被本報連日踢爆「曾商勾結」，歎盡富豪提供嘅海陸空款待，不知廉恥。一向敢言嘅「白姐姐」白韻琹都睇唔過眼，尋日打去香港人網大鬧煲呔曾貪得太Cheap，出賣港人尊嚴。
白姐姐話：「貪坐遊艇又畀番錢，明知故犯，要畀就畀足錢啦！」佢仲話，如果煲呔曾唔提早落台，相信有一百五十萬港人上街，就算佢腳痛都會參加喎。
白姐姐愈鬧愈慶話，如果主持人要去「打小人」打煲呔曾嘅話，佢會帶埋釘鞋去打埋一份。
除白姐姐鬧爆外，身在政府嘅勞工及福利局政治助理莫宜端都喺facebook慨嘆話，呢幾日對香港突然感覺好陌生，呢個城市嘅一切、領袖係好係壞，佢都有份，仲求主賜佢智慧，明瞭真象喎。講到咁，莫非暗示自己上錯咗煲呔曾呢隻賊船？