政情：MC Jin Rap起錨勾起學生噩夢

雖然條片得短短兩分四十秒，但「香港所有市民，起錨！聖誕節又嚟臨，起錨！」就足足叫咗十六次，如果有經歷過今年五月一連串起錨騷嘅市民，聽到呢兩句肯定會勾起唔少回憶，除此之外，條片仲串連埋三三四新學制一齊Rap，依家班中四、五學生畀完全唔同嘅教學模式搞到一頭煙，聽到肯定發噩夢。

雖然成首起錨歌由旋律同歌詞主要都係MC Jin創作，不過原來特首辦早有交代，指「起錨」、「三三四」、「facebook」都係過去一年香港政府最熱門、最得人心嘅議題，所以首歌一定要有呢幾個元素。喺facebook開戶口算唔上喺乜嘢德政，三三四更加係噩夢。特區政府喺過去嘅一年乏善足陳，畀呢一年靜靜雞過咗去就算，串連「德政」更加係唔搞好過搞。

我哋問返特首辦點解無端端要拍片，發言人話係想搵個特別啲、輕鬆嘅方法同市民慶祝聖誕，所以一個月前特別度呢條橋出嚟，條片仲喺政府內部被喻為年度佳作添！

誤當煲呔曾係一個職位

特首辦仲話，搵MC Jin幫手，係因為佢係Rap界非常出名，又有豐富嘅音樂才華，年輕人見到一定會喜歡；更難得嘅係MC Jin聽到特首辦要求後一口應承，兩三日就起到貨，可算係一拍即合。不過唔知大家仲記唔記得，MC Jin曾經講過，搞唔清煲呔曾到底係一個人，定係一個職位，特首辦搵佢做宣傳，會唔會有反效果㗎？

實情係條片post咗幾個鐘，已經劣評如潮，畀網民喪插無聊、肉麻當有趣、官員瞓身做小丑等，唔知政府又諗唔諗到有呢啲回應呢？