政情：中大沈祖堯獲贈小行星
中文大學尋日舉行開放日，更係好事成雙嘅日子，皆因香港天文學會會長楊光宇將自己發現嘅兩顆小行星送咗畀中大，分別以校訓「博文約禮」同校長沈祖堯命名。沈祖堯當然好開心啦，仲好感激楊光宇對中大嘅感情，但佢亦好謙虛咁話，覺得自己唔配同中大相提並論喎。
楊光宇因為喺外地，冇出席開放日，但中大就播咗佢早前錄影嘅短片。楊光宇喺片段中話，因為睇咗新亞書院嘅話劇，被中大嘅教育理念感動，加上好欣賞沈祖堯喺沙士期間嘅貢獻，所以將自己發現嘅小行星命名為「博文約禮星」（88878 Bowenyueli）同「沈祖堯星」（88879 Sungjaoyiu），今年年中先得到國際天文聯會批准。佢仲講笑，既然送粒星畀中大，順手送埋畀校長喎。
沈校長坦言被獲贈小行星好意外，因為唔係好認識楊光宇，亦好少同佢接觸，今次收到咁大禮都好驚訝。佢又引用校訓話︰「君子博學於文，約之以禮。希望中大生唔止有學識，仲要有學養。」