中環耳目：容永祺歎意粉回味米蘭風情

位於銅鑼灣開平道嘅da Domenico，名人客仔多籮籮，賭王何鴻燊一家都係常客。周二食晏，見Samuel由公司快步行去da Domenico，原來約咗太太及公司同事食飯。呢間餐廳主打傳統意菜，紅蝦意粉叫好又叫座。Samuel話，去年遊米蘭度假時幫襯過一間有一百年歷史嘅意國餐廳，一試難忘，估唔到喺da Domenico搵番呢種風味。到底係乜感覺咁正？原來係一種由意粉透出嘅誘人香氣，加埋新鮮紅蝦，真係難得嘅好味道。

Samuel又點咗煎牛肝同燒魚，食到舔舔脷，雖然每道主菜平均收費五百多元，但Samuel話物有所值，聖誕就到，就當係慰勞自己嘅聖誕禮物。