中環出更：周國豐父子一個包兩份食
教仔有好多方式，不過無嘢好得過畀孩子一個溫暖家庭，已故社交名人周啟邦嘅獨子周國豐（Brandon）就係城中罕有嘅住家男人，有一日卓妮見佢陪太太Jenny行超市，更將一個麵包與囝囝周禮淳兩份食，父子情深，羨慕死人。
本身係大律師嘅Brandon，年初榮升做爸爸，一家三口樂也融融，每次提起囝囝就笑不攏嘴。卓妮撞到佢嗰日，係星期四晏晝五點半，換上休閒便服嘅Brandon推住架BB車，三口子齊逛ifc嘅連卡佛同citysuper。行行吓，囝囝嗌肚餓，Jenny馬上將啱啱買嘅麵包搣成一小舊，遞到BB嘴邊。但BB食量有限，食幾啖就飽。眼見麵包仲剩番大半舊，Brandon一於食得唔好嘥。咁有衣食，抵讚。
咬住麵包嘅Brandon見到卓妮上前打招呼，大方地企定定影番張全家福。卓妮留意到，Brandon雖然係富家子，但行街都冇帶工人喺身邊，將奶粉袋掛喺BB車上，湊仔一腳踢。
廿四小時
實囝囝
Jenny更透露，佢一刻唔見個仔就心掛掛，所以家中安裝攝錄機，出街都亦可以透過iPad，廿四小時監察到囝囝嘅一舉一動。嚟緊聖誕，Brandon諗好節目，一家三口遊新加坡過暖笠笠聖誕，目標係去環球影城狂歡喎。
卓妮