中環出更：范邦初激似周松崗
人有相似，喺世界某個角落發現另一個自己，一啲都唔奇。「特別熊」嘅馬主范邦初就同港鐵CEO周松崗生成同一餅印，連范生自己都話，初次見到周松崗，腦內即時泛起連串問號：「點解咁似我嘅!?」
超級啤啤熊迷
新馬「特別熊」早前喺沙田初登場，馬主范邦初到場打氣，卓妮幾乎錯認係周總，睇真啲，范生面形圓潤啲，但無論眼神、髮型同身形，同周總都非常相似。范生見怪不怪，笑言唔止第一次聽見有人話佢似周總。有次喺公開場合首次見到周松崗真人，連自己都嚇一跳。
范生從事塑膠生意，做咗馬主十幾年，旗下有多匹名駒，統統有個「熊」字。原來佢係超級啤啤熊迷，家中收藏大批熊公仔，每次入馬場更會打番條熊仔呔求好運，佢連電話繩都繫上熊公仔添。睇怕呢點，周總就唔似佢嘞。
其實世上似樣嘅人唔少，例如食物及衞生局副局長梁卓偉同台灣嘅前總統陳水扁兒子陳致中好似樣，而立法會議員林大輝同菲律賓總統阿基諾三世嘅笑容，幾乎一模一樣，唔信大家睇吓。
