政情：仁人齊做包尾大幡
泛民主派喺最近半年正值多事之秋，先有喺議事廳發起不合作運動引起市民不滿，加上一批泛民於佔領行動清場時齊齊「博拉」，個別議員被指收取壹傳媒集團前主席黎智英政治捐款一事仍解得唔清唔楚，踏入二○一五年嘅最新民調顯示，曾承認部分捐款「袋住先」近九個月嘅工黨主席李卓人，最新評分只有二點一六分，暴跌零點三四分，於三十五名直選議員中排包尾；最近提出否決政改後辭職公投嘅民主黨議員「AV仁」何俊仁亦民望急挫，最新評分下跌零點一一分，僅得二點二三分，連續第六次於俗稱「超級區議員」嘅區議會第二界別議席位居榜末。
「超級」AV仁六度墊底
香港研究協會於本月八至十五日，以隨機抽樣電話訪問一千一百七十八名市民，了解佢哋對三十五位直選議員同五位超級區議員嘅評分，以一分為最低分，六分為最高分，結果泛民多個政黨代表都得分「大插水」，其中李卓人僅得二點一六分，於新界西九名直選議員排最尾，亦係三十五名直選議員得分最低，調查機構相信同市民對其近期表現未感滿意有關；緊接李卓人跌幅第二多嘅都係泛民議員，就係公民黨黨魁梁家傑，得分急跌零點三分至二點四一分，於九龍東排榜末。
被視為含金量最高嘅五名超級區議員，建制同泛民代表得分兩極化，工聯會議員陳婉嫻等人得分上升，白鴿黨AV仁同涂謹申，以及民協馮檢基得分齊齊下挫，依次下跌零點一一、零點零九及零點零七分，得分介乎二點二三分至二點七三分，其中AV仁連續六次蟬聯超級區議員末席，調查機構相信同AV仁近日提出辭職引發變相公投，未能得到市民認同有關。
除此以外，泛民部分議員評分亦顯著下跌，例如同屬新界西直選議員嘅人民力量陳偉業同公民黨郭家麒，分別下跌零點二八同零點二六分，其中前者有二點一七分，得分僅高過李卓人；至於得分最高嘅議員係立法會主席曾鈺成，有四點一九分，其次為新民黨葉劉淑儀嘅三點六分。講到底，身為民意代表嘅議員就要急市民所急，否則繼續逆民意而行，下次調查分分鐘有機會評分再創新低！