政情：劉健儀斥哪吒冇心肝

面對栽培多年嘅新東骨幹離巢，主席劉健儀（Miriam）尋日氣憤難平，指對哪吒退黨i晒頭，又稱一直「攞個心出嚟」當哪吒係妹妹，點知人哋唔領情，就好似《綠野仙踪》裏面嘅錫鐵人一樣「冇心肝」，又暗批哪吒退黨另有所圖。

自由黨經歷田二少退黨，軍心不穩，田少復出，即刻行動，尋日拍住Miriam落區，向葵涌石籬邨公屋長者派出一百部暖風機同五百個暖手包，大灑銀彈，為嘅係要顯示直選決心不變，豈料，前晚突然傳出黨內最有望進軍直選嘅第二梯隊哪吒退黨，令自由黨直選新東更加難行，呢盆冷水對田少同Miriam嚟講，比近日嘅冷鋒更加冷。田少話，無察覺哪吒退黨同新東參選排位問題有關，哪吒連民選區議員都未係，講參選立法會實在言之尚早嘞，言語間流露不悅情緒。

Miriam對哪吒退黨更加氣結，大家聽吓佢點講就知。Miriam話，哪吒前晚成十一點畀手機短訊佢，話多謝兩年嚟嘅栽培，祝佢身體健康，多年交情，就換嚟呢兩句說話，又話哪吒平日根本鮮有參與黨務，唔做中常委，又唔出席商討政策事宜嘅一般事務關注組，依家先嚟話同黨嘅路線唔啱：「我都睇到i晒頭，到底咩事呢？」暗示哪吒退黨另有內情，只係唔敢講死係咪有人存心玩自由黨。

「當佢妹妹 真係好痛」

Miriam反覆強調用心同哪吒交往：「我自己對人用心，當我用心，你唔用心對我，我點挽留都冇法子。我係會有心淡、會有心痛，我都有個心㗎！」Miriam強調，咁多年盡心栽培哪吒，「我真係當佢係妹妹，我真係好痛！」

Miriam對哪吒退黨因由大惑不解，但據新東地區消息透露，上星期五自由黨集思會上，哪吒向黨交文件，指自己有信心勝出區議會，希望自己成為新東重點栽培對象，為一二年作準備，所以，外界指哪吒今次係為不值失去一二年新東出戰權而劈炮，真係講到似層層。