政情：飯鐘錢風波陳裕光外父無詐型

陳裕光尋日見傳媒，無可避免又講起扣飯鐘錢事件，話成件事大家樂創辦人即係佢外父羅騰祥無詐過型，因為佢老人家已經隱退咗廿五年，已經無理會公司嘅嘢，所以無煩到佢。陳裕光自己本來仲有兩年就退休，半年前已放手畀班下屬打理，點知搞出個大頭佛，所以又要做番多啲。

大家樂畀人改咗做「太刻薄」，令到陳裕光好唔開心，覺得大家樂喺香港四十年，如果係無良就唔會屹立到今時今日都未執喎，仲話公司都對員工好好，廿年前已經有男士侍產假，仲搞置業安居貸款幫員工買樓，又資助低薪員工嘅仔女讀書，有個茶水阿姐兩個仔女就係咁讀大學仲做埋醫生添。經過今次佢形容嘅「文革式批判」，佢話都要諗下係咪搞番個平台同員工溝通多啲。