中環出更：黃銳林潮揹師奶袋
潮流興環保，好多人已經接受出街自備環保購物袋。早前卓妮見到包浩斯（Bauhaus）主席黃銳林（George），平時佢着得瀟灑有型，但當日揹咗個顏色斑駁嘅大型真皮手袋，驟眼望落好似師奶環保先鋒。不過千祈咪以貌取人，原來個Tough Jeansmith好有內涵，仲識變身，難怪甫推出市面即刻成為George嘅新歡。
變身做公事包
卓妮見個袋表皮殘晒，好有滄桑感，仲以為係George用咗好多年嘅環保袋，其實個袋出咗三、四個月咋！George勁讚個袋設計好靚，底面分別係黑色同紅色，佢仲即時示範變身魔法，唔使幾秒鐘將個巨袋變成有型嘅公事包，終於襯番佢貴為上市公司老細嘅形象。
Bauhaus旗下有超過十個自家品牌嘅服裝、手袋同埋配飾，George永遠不愁冇新寵。近排佢極力推介皮褸，事關佢哋自家製造嘅羊皮褸薄身又有彈性，着得好舒服，啱晒唔係經常冰天雪地嘅南方冬天穿着。