政情：議員赴諾獎無衫着
諾貝爾和平獎頒獎禮下星期五喺挪威舉行，今年和平獎得主係內地異見分子劉曉波，佢應該無機會親自去攞獎喇，支聯會副主席李卓人同秘書何俊仁事先張揚，話到時會親自出席頒獎禮，為劉曉波吶喊，仲打算去當地嘅中國領事館示威添。
不過，兩位支聯會骨幹成員未出發已經好頭痛，何解？原來兩個都冇衫着囉。唔係嘛，兩位都係尊貴嘅立法會議員，點會冇衫着呀？原來，諾貝爾和平獎頒獎禮大會規定，所有出席嘉賓必須穿着正規燕尾服（踢死兔），今次真係畀大會考起。
阿人話，平日有時都會着西裝，但踢死兔呢類正式禮服，連結婚嗰陣都無着過。至於鐵頭仁仲搞笑，話必要時拎番結婚嗰套出嚟，但十成九都着唔落喇，不過鐵頭仁後來了解過，原來着中山裝都可以。一輪商討之後，兩位決定着中山裝出席，但問題未解決喎，事關佢哋都冇中山裝，亦唔知去邊度買，結果都係要向朋友求救！