政情：梁卓偉孖陳智遠Shopping？
食物及衞生局規管骨灰龕場同推行醫療保險計劃，搞到一鑊泡，睇怕局內官員都好難會得閒。不過，前日下晝五點幾，我哋竟然喺中環ifc行人天橋遇到食衞局副局長梁卓偉（Gabriel）同政治助理陳智遠（Paul）急步行過，Gabriel手上仲攞住ifc三樓間「福茗堂茶莊」嘅紙袋，紙袋口仲用膠紙貼實，似係啱啱Shopping完離開。
Gabriel同阿Paul急步沿天橋經過太子大廈、渣打銀行總行及炮台里返回政府總部，期間兩人冇乜笑容，亦冇乜交流。曾經被赤泥坪村村民稱呼為「小弟弟」嘅阿Paul，出入商場時就幫Gabriel開門。我哋上前打招呼，問Gabriel咁急去邊，點知佢唔瞅唔睬，表現得好Cool，繼續大步向前行。莫非佢心情唔好？抑或辦完公事順便去Shopping，所以唔係咁方便講嘢呢？
講番福茗堂，呢間茶莊相當出名，茶葉種類繁多，每年會派專業茶師到各地茶園選購質優價實嘅靚茶葉，更喺內地自設廠房，由專業茶師主理茶葉培植、採摘、製造及鑑定，引用低溫風櫃儲藏茶葉，保存茶葉特性。如果Gabriel真係有幫襯開呢間茶莊，就認真識貨喇！