政情：新民黨「進出口」前AO
政務官（AO）出身嘅前政府官員喺政商界一向係「搶手貨」，尋日上任機場管理局主席嘅蘇澤光，未來要應對多個重大議題，包括興建機場第三條跑道爭議、機場北商業區未來興建超級購物城等，因此機管局都唔例外，最近向新民黨挖角，睇中曾任該黨政策總裁嘅前AO王瑤琪，並於尋日開始出任機管局企業事務總經理，新民黨隨即又搵咗另一名前AO加盟，似乎新一輪前AO「執位」勢必出現。
最新加入機管局嘅王瑤琪，據聞九十年代開始做AO，二○○八年離開政府前出任商務及經濟發展局助理政府資訊科技總監，而離開政府後，王瑤琪曾到醫管局任機構事務主管，上月底離任新民黨政策總裁一職。
蘇澤光靠王瑤琪「打仗」
除咗王瑤琪外，最近加入機管局嘅有前新鴻基地產（中國）董事及項目總監區浩章及市建局前企業傳訊總監邱松鶴，前者於機管局擔任物業發展執行總監，後者於今年二月開始出任首席傳訊主管，似乎機管局未來多場硬仗，佢哋都會於唔同崗位出一分力。
新民黨雖然剛剛被挖走一名前AO，但話咁快就物色到另一名前AO加盟，此人就係二○一二年退休前任南區民政事務專員嘅黃彥勳（Alex），尋日開始履新接任該黨政策總裁，據聞新民黨主席葉劉淑儀一知道Alex過晒冷河，就搵Alex幫手，而且二人仲好有淵源添。
黃彥勳「廉價」協助葉劉
葉太話，自己同Alex識咗至少三十年，以前喺貿易署共事過，而當年佢到美國讀書，仲帶埋女兒去探當時駐華盛頓工作嘅Alex。不過咁都未算，據聞葉太女兒同Alex嘅兒子年紀差唔多，仲一齊喺史丹福大學讀暑期班。對於今次Alex加入新民黨幫手，葉太笑言對方係「廉價義工」，除咗做政策研究外，仲會幫手搞選舉。
眾所周知，葉太過去多年都係紮根港島區，其中南區喺佢大本營之一，依家有埋Alex幫手，二人一拍即合，真係如虎添翼嘞！話時話，前AO又熟悉政府運作，又有一定政治敏感度，難怪多個商會同公營機構對佢哋「情有獨鍾」。