政情：五散人遊怪醫診所
立法會醫學界代表梁家騮（怪醫）早前離開工作多年嘅沙田威爾斯親王醫院，拍住骨科醫生哥哥梁家麒齊齊開檔搵真銀。怪醫喺中環太子大廈嘅診所上個月底已經開業，佢嘅立法會「五散人」好兄弟尋日特登上診所賀一賀老友。
工業界林大輝、資訊科技界譚偉豪、會計界陳茂波同保險界陳健波，尋日下畫約埋上怪醫間診所，陳茂波因為同朋友食飯遲咗少少，其餘三位喺途中咁啱撞見自由黨副主席方剛，即時拉埋方剛一齊上去診所參觀，林大輝仲徇眾要求，試坐張檢查身體用嘅床添。據聞張床要成萬蚊，一啲都唔平㗎！
成班大男人之後喺怪醫嘅辦公室四圍貢，發現辦公室內有乾坤，牆上掛咗部ＬＣＤ大電視，原來係畀怪醫睇立法會現場直播，隨時留意立法會嘅開會情況，有需要五分鐘內就可以趕返去投票。怪醫嘅用意當然係好啦，之不過立法會大樓明年九月就會搬去金鐘，到時怪醫嘅如意算盤就打唔響喇。