政情：邱副甩底要Eva鄭補鑊
我哋前日報道，運輸及房屋局副局長邱誠武擺官威，本來約好菜園村村民同鄉議局主席劉皇發開三方會議，傾村民申請復耕牌照準則，但邱副唔齊人唔肯開會，臨時甩底，電話又打唔通，激到村民紮紮跳。據悉，報道出街後，邱副嘅上司、運房局局長鄭汝樺尋日親自過問事件，承諾幫村民加快審批牌照，配合村民十月限期前搬遷，簡直就係幫邱副補鑊。
菜園村申領復耕牌照總共有八十六宗，涉及三十六個大家庭，其中二十個家庭嘅申請被政府彈番轉頭，當局本來只願意繼續同七個家庭討價還價，但前日邱副放村民飛機事件曝光後，其餘十三個家庭又可以望到一線曙光。
菜園村支援組成員葉寶琳尋日話，當局突然轉性，之前對開唔開三方會議、甚至係咪見晒被彈回嘅二十戶家庭定係只見同意上訴嘅七戶，都表現得扭扭擰擰，依家態度爽快咗，邱副約實今日朝早同大家開三方會議，如果喺審批牌照準則達成共識，仲肯即刻同二十戶家庭「面試」添。政府突然變得咁好相與，唔知同Eva鄭介入有冇關呢？