【本報訊】「個司機開到架車好似舞龍咁，左搖右晃，好危險。」險死的乘客表示，當時見司機如斯駕駛，曾商量落車，但最終放棄念頭，沒想到即出事。「職業司機都醉駕，離晒譜！」乘客怒斥小巴司機罔顧安全，攞乘客命較飛，紛紛要求政府修例嚴懲醉駕，「如果醉駕要坐十年監，睇吓仲有冇人敢醉駕。」
乘客張先生表示，昨日因晚起床，為趕時間才選乘「紅頂」小巴到旺角上班。他在白沙灣上車時，發現司機面露疲態，目光呆滯，好似剛玩完通宵、飲過酒或「索咗嘢」一樣。
在事故中腳部受傷的張指，沿途的車速約七十至八十公里，有時測速器響個不停，司機也毫無反應，小巴車身搖晃不斷。由於座位沒有安全帶，他已暗中握緊扶手。他說，其他乘客也覺得不妥，其身後有人在途中商量是否落車，惟最終無人下車。他指，日後見到司機「唔精神」，一定不會乘搭，以免再受驚受傷。
事發時坐於小巴尾二排座位的錢先生表示，昨他與太太從西貢南圍乘搭肇事小巴，準備到旺角新世紀廣場，途中已覺得不妥，「本來諗住中途落車，但諗吓路程短，博佢唔會有問題，結果就博輸咗。」錢斥責職業司機醉駕離晒譜，絕對不能接受，政府必須用重罰無視市民安全司機，絕對不能姑息。