政情：港人無懼炮火 繼續遊韓
南北韓緊張對峙，港股一度應聲急跌幾百點。聖誕假就到，韓國本來係滑雪聖地，但畀炮火炸一炸，仲應唔應該去?康泰旅行社總經理黃進達（Jason）話，報團去南韓人數係少咗，但依然有人照去可也。
Jason尋日現身馬場，為爸爸黃士心隻愛駒「旅遊大亨」打氣，講起遊韓旅客有否受炮火影響，Jason就氣定神閒話影響唔大，事關港人挑通眼眉，知道南北韓對峙其實好濕碎，滑雪季節臨近，一於照出發。
旅遊業近年挑戰多，喺美元急貶值下，出門旅行皮費重咗好多，連帶旅行社嘅營運成本都增加，點拆招好？Jason就話，公司一向有做外幣對沖，匯價波動對佢哋衝擊唔大。雖然呢排日圓好似坐火箭咁攀升，但港人對日本情有獨鍾，Jason話報團人數有增無減，總算飲得杯落。