香港電台又換台長，令好多人跌眼鏡，事關廣播處處長黃華麒曾一度盛傳獲政府首肯續約，點知結局卻係另一個版本。據聞，政府內部的確由始至終希望麒伯留任，初時亦信心滿滿，諗住高官厚祿嘅誘惑無人可以拒絕，點知廿八年前已度過不惑之年嘅麒伯，根本唔恨同政府打工，以健康理由堅決唔續約，政府頓失預算。
麒伯續約問題迂迴曲折，最早喺十月中傳出佢向政府表明唔想續約，其後官場盛傳，麒伯同政府早有默契，續約至少一年，但最後佢老人家都係以健康理由唔再續約，當中談判究竟有乜轉折？
原來，今次港台台長去留問題，主動權全掌握喺麒伯手上。據了解，政府早已向麒伯表明，希望同佢續約，雖然麒伯期間做過「通波仔」手術，但商務及經濟發展局局長劉吳惠蘭無停過游說留任，諗住高官厚祿可以留住麒伯。
所以，政府上下一度頗有信心，點知麒伯到最後都係企硬明年二月約滿離任，令到唔少高官都跌到一地眼鏡碎。