中環出更：劉燕卿品酒學以致用
每年十一月第三個星期四，係法國布根地（Burgundy）南部薄酒萊（Beaujolais）酒區新酒開賣日，世界各地嘅愛酒之人都引頸以待。香港餐飲聯業協會會長黃家和（Simon）都訂咗二千四百支新酒回港，上周六喺上水慈康農圃搞咗個嘉美雞葡萄酒晚會，請咗二百多位老友試酒，包括中聯辦副主任郭莉及消費者委員會總幹事劉燕卿（Connie），非常熱鬧。
卓妮去到試酒會，各款Beaujolais紅酒已經整齊列陣，等候賓客品嘗。Simon做飲食對酒有認識唔出奇，但原來Connie都素有研究。Connie話自己喺大學畢業後已開始學習品酒，所以對酒都有啲認識，但佢強調自己絕對唔係鍾意飲酒，純粹只係飲酒屬於消費項目之一，所以希望加深對酒類認識，果然係「三句不離老本行」。眾多葡萄酒產地之中，Connie最鍾意Burgundy，覺得full body質感較厚滑。
唔講唔知，原來消委會都有做過葡萄酒測試，Connie記得嗰期《選擇》月刊係「四大天王」黎明做封面，仲話嗰次消委會特別派職員遠赴外國紅酒產區做測試。不過，嗰次測試已經係多年前嘅事，Connie話家陣飲紅酒咁盛行；如果有需要，可以再做一次喎。
郭莉參觀農場開懷暢飲
當日卓妮仲見到中聯辦副主任郭莉。原來Simon同郭莉認識多年，Simon話，郭莉以前喺內地種田，但來港後未見過好似佢農場咁好嘅地方，於是好有興趣到場睇吓，仲詢問好多同農場有關嘅問題。不過，Simon話郭莉同所有嘉賓一樣，都係以私人性質參加試酒會，大家開懷暢飲傾吓偈，目的都只係想可以暫時放下繁忙嘅都市生活。
「薄酒萊」產區的新酒稱為Beaujolais Nouveau，係以每年收割嘅加美（Gammy）葡萄釀製新酒，只用四至五天時間釀製，酒身輕盈，充滿果香味。
卓妮