政情：李霖恩呻老竇買貴樓
政府連番抑遏樓價，上星期五又出招，高官入貨變得特別敏感。原已持有兩個沙田碧濤花園單位嘅保安局局長李少光，近四個月內兩度入市，再掃入該屋苑兩個分別一千三百呎同九百五十呎嘅物業，樓價分別係五百五十萬同三百一十八萬元，點知被某傳媒大書特書。光哥兒子李霖恩坦言對報道唔開心，仲話：「如果一早知道，就遲啲買啦，買平啲嘛。」
光哥一向鍾情碧濤花園，上月再入貨，係買畀任職演員嘅兒子李霖恩自住，據報剛好可以喺徵收額外印花稅新例前，完成簽訂正式買賣合約。光哥愛子無罪，買樓有理，一樣難避是非，不過，李霖恩話，爸爸無為事件唔開心，反而李霖恩就有啲唔安樂，事關兩層樓中大嗰間原本係藝人蔡少芬嘅，李霖恩喺毛舜筠穿針引線下買咗層樓，而毛毛就無辜捲咗入新聞裏面。
李霖恩又為爸爸呼冤，指爸爸入市，係想畀兒子一家三口住得闊落啲，唔係炒樓！「如果一早知道（政府出招），就遲啲買啦，買平啲嘛。」