政情：方剛發火轟田二少

自由黨上周二傳出家變疑雲後，黨主席劉健儀（Miriam）一度振振有辭，聲言「咩事都冇發生過」。身為黨副主席嘅方剛尋日就為Miriam解畫，佢話上周二開黨團會議時，Miriam突然透露田二少有意退黨嘅消息。方剛本人同另一副主席張宇人（Tommy）聽到後都好錯愕，認為田二少喺呢個時候退黨對黨不利，所以叫Miriam唔好向外公布消息住，等佢哋同田二少坐低斟斟，睇吓有冇彎轉先。

雙方最終當然係傾唔掂數，方剛尋日講起時仍然難掩內心不滿：「我發現佢真係冇乜黨性，點可以喺個黨傾好立場後，又出去發表個人意見！呢啲冇黨性嘅人留喺黨都冇乜用。」佢又炮轟田二少喺黨內唔聽人意見，「好自私」：「你要轉直選，落區派傳單係你勤力。你要上位唔緊要，但都唔好踩住人上位吖，仲喺度周圍抽水！」言談間，流露出方剛等自由黨核心對田二少就最低工資同罷食大家樂等事件同黨打對台嘅不滿。

暗嘲即將大禍臨頭

繼最低工資後，另一「工商界炸彈」標準工時亦即將殺到。方剛坦言，如果就標準工時立法，對佢所代表嘅批發及零售界影響極深，所以佢擺明車馬會反對。此時佢亦不忘暗嘲田二少即將「大禍臨頭」，事關二少身為時裝零售店嘅大老闆，亦難以獨善其身：「佢依家係『良心僱主』嘛，返唔到轉頭喇！」田二少最終會否「兩面不是人」，大家不妨拭目以待。

二少唔想隔空罵戰

面對前黨友批評，田二少起初只透過助理表明，退黨後會堅守當初與Miriam達成嘅協議，唔回應任何針對黨友嘅言論。點知傍晚佢又親自來電話，「公說公有理，婆說婆有理」，佢話你一言我一句，好易變成隔空罵戰，希望舊黨友唔好成日摷番舊事嚟講。其實且不談係咪田二少理虧在先，正所謂「相嗌唔好口」，再對罵落去，對大家都無好處，唔知身為二少大佬嘅前黨主席田北俊點睇？