中環出更：孫太護老公為縮班解畫
教育局局長孫明揚最近力推中學縮班，惹來各界連環炮轟，連講開天文學嘅前天文台台長林超英都開腔為學弟抱不平，總之群情洶湧唔知點收科。作為孫公「背後女人」嘅孫太鍾小芬，日前行街Shopping都不忘為老公講好話，聲言如果政府對中學投放嘅資源充足，就唔使逼中學縮班喎。莫非孫太暗寸煲呔曾唔肯開水喉推行中學小班教學？
珠寶店買話梅？
孫太不時到中環行街Shopping兼High Tea，卓妮上周四又見佢出動，同朋友去咗太子大廈一樓間「惠記珠寶」店買首飾兼打牙骹，大概睇咗半個鐘離開，手上多咗個「惠記」手挽紙袋。問孫太買咗乜嘢靚嘢，佢就笑笑口話：「無買嘢，紙袋入面載住包話梅啫！」莫非佢將珠寶當話梅？
卓妮於是轉個話題問孫公有否為縮班風波搞到唔開心，孫太就話，孫公無為此唔開心，只係做番自己應做嘅事。佢話本港出生人口不斷下降，一定要有相應教育政策去配合，可能將來出生率上升，情況又會唔同咗，孫太仲以自己為例話：「我以前教書，都試過教五十幾人一班啦！」
不過，孫太猛呻，話歸根究柢都係錢嘅問題，如果有人肯攞多啲錢投入教育，就唔使縮班啦！又好難怪孫太咁講，事關煲呔曾只係承諾任內推行小學小班教學，無話過推中學小班，所以想叫佢開水喉都幾難囉。