政情：藥費昂貴高錕停服病轉差
光纖之父、諾貝爾物理學獎得主高錕同太太黃美芸近日返咗香港，最主要係籌辦高錕慈善基金會，幫助老人癡呆症嘅患者，但原來高錕本身都需要人幫助，事緣諾貝爾獎嘅獎金雖有五百萬港元，但唔可以支持太耐，高太接受電台訪問時就透露，原來高錕今年中因為新療程藥費太貴，曾經停止服藥四、五個月致病情變差。
高太仲話，自己明知丈夫嘅病情會走下坡，佢已經做好心理準備，好彩最近都有唔少開心事，令兩公婆笑口常開。最值得高興嘅係，九月十九日係高錕同太太結婚五十一周年紀念，咁啱佢哋返到嚟香港，可以喺呢度慶祝。唔講唔知，高錕依家胃口唔錯，成日食嘢，搞到肥咗三十五磅，加上佢留咗鬍鬚，遲啲可以扮埋聖誕老人，為身邊嘅人送上歡樂。
除咗成立慈善基金會，高錕今次返港，會逗留到十月中親自接受大紫荊勳章後才走，不過高太依家仲未同高錕講攞大紫荊嘅事，話唔定係想畀個驚喜佢。中文大學亦會豎立高錕銅像，高太話有兩個要求，就係希望個銅像唔好企得太直，同埋最好係「單手插褲袋」嘅造型，因為有型啲喎。