政情：龔仁心做善事重結果

接管遺產管理權後，龔仁心變身慈善家，佢尋日出席仁愛堂一個論壇，講佢對慈善嘅睇法，佢以青海地震中犧牲嘅港人義工黃福榮為例，講解做善事所必須嘅係博愛嘅心，而唔係用金錢多少嚟衡量，即使喺巴士上讓座畀其他人，亦一樣係做咗善事。

佢又話無論以咩方式做善事，只要對受益者有好處都係好事，所以不必追求做善事嘅原因，好似質疑人哋做騷咁，其實只要係做咗好事，理得人哋係唔係做騷，否則阻礙咗人哋做善事，咁就好唔公平啦！

兩岸四地都有慈善事業，龔仁心覺得港澳台做得比較成熟，內地起步就比較遲。龔仁心上個月同宋慶齡基金會一齊做善事，幫助內地發展基礎教育同醫療事業。