政情：范太發火幫羅太捉鬼

港區人大尋日開每兩個月一次嘅例會，匯報十七次人大常委會會議內容、考察東江水同深圳人大學習班情況，議程沉悶，但議程之外卻火花四濺。據悉，尋日出席嘅二十多名港區人大，當私下坐埋一枱傾偈時，唔止一人開腔批評，不滿同僚中有人對傳媒洩露趙連海求情信內容，做法好有問題。佢哋嘅用意好明顯，即使明知難於「捉鬼」，揪出洩密者，都要對「內鬼」作一次嚴正警告，防止「洩密」事件重演。

事實上，范太喺開會之前已經公開「捉鬼」，指港區人大之間早有協議，聯署信內容唔可以公開，連聯署人名稱都要保密，以免令不願聯署嘅同僚承受輿論壓力。點知星期一送出聯署信後當晚，已經有電台烽煙節目喺大氣電波讀出聯署信嘅初稿內容，仲噏得出其中八個無份聯署嘅人大代表名字，顯然同僚之間有「內鬼」。

怒罵洩密者缺德

范太形容今次洩密事件係「好不幸」，洩密者身為港區人大，理應比一般人明白國情，事關將聯署信公開，等如將事件政治化，令內地當局誤以為港區人大想攞威貪功，向內地施壓，咁對幫助趙連海有害無益，普通市民就話唔明呢個道理啫，港區人大都犯下咁嚴重嘅錯誤，攪亂個局，洩密者簡直係缺德！

老實講，港區人大邊個洩露聯署信內容，相信永遠都揪唔出元兇。工聯會黃國健（KK）亦指，根本無可能搵到隻「鬼」，范太縱然有火，都無喺會上質問邊個係「鬼」，只提醒大家第日真係唔好咁做嘞。KK亦顯示清白同傳媒講，佢收到份聯署信後，好快銷毀咗，表示佢唔係嗰隻「鬼」，姿態光明正大。見KK一臉嚴肅，就知范太發火，公開「捉鬼」，點都起到多少「示警」作用。