政情：梁耀忠爆料數臭卓永興
卓永興早前做食環署長嗰陣，出咗名同工會關係惡劣；點知啱啱調任勞工處處長嘅佢連位都未坐上，就畀勞工界數臭，要現任處長謝凌潔貞同勞福局常秘鄧國威為佢說盡好話。話說尋日立法會人力事務委員會開會，即將調職做教育局常秘嘅謝太都有出席，梁耀忠恭喜佢升職之餘，仲乘機「詐型」話，未來嘅勞工處處長卓永興表現好差，肯定唔會好似謝太咁，一定會好少時間同民間對話、溝通喎。
長毛：逢係豬都係咁
阿忠仲數落卓永興啲衰嘢，話佢喺食環署嗰陣，約佢永遠約唔到，好難見；即使要見團體，卓永興都會畀壓力啲手下，叫手下「自己去見啦」。
梁耀忠最後忍唔住爆料，話試過打電話畀卓永興，點知佢竟然話趕住去食飯，唔講電話喇。阿忠話當時都不留情面醒咗佢一句：「咁好唔禮貌喎。」長毛一邊聽、一邊鬧卓永興係壞人，仲語帶諷刺話：「逢係豬都係咁，一食嘢就唔講嘢！」搞到在場議員捧腹大笑。
勞工界咁唔妥新處長，謝太同鄧常秘惟有為卓永興講番啲好話。謝太話曾經同卓永興共事過，對佢有信心；又話可能佢去食飯就係為咗同持份者溝通喎。鄧常秘都幫口：「邊個做局長、署長、秘書長，都會廣徵民意，同持份者溝通嘅。」不過好話說盡都無用呀，過到議員嗰關至算喇！
