中環出更：阿松肥亨搞笑斷背情
官場冷箭特別多，前財政司司長梁錦松就同前商務及經濟發展局局長馬時亨卻係難得嘅沙煲兄弟。
兩人尋日齊為智能電子產品Oregon Scientific嘅ifc旗艦店剪綵，肥亨同阿松將私生活搬到鏡頭前，攞起個發熱按摩器互捽背脊，上演一幕搞笑斷背情。
肥亨向來注重健康，尋日率先試坐新推出嘅溫熱按摩坐墊，大叫舒適，變身sales叫阿松買番張，又攞起個手提按摩器幫阿松碌背脊，邊碌邊畀高帽對方戴：「你賺錢多過我，一定好疲勞嘞。」阿松不甘示弱，攞起個按摩器同肥亨碌番轉頭，氹到肥亨笑騎騎：「嘩，財爺幫我碌背脊，呢張相值錢呀。」
阿松咁玩得，確係少見。令佢變得開朗，原來多得三個仔女。阿松講起做湊仔公就心甜，問佢有冇同太太伏明霞上廣州睇亞運，佢話小朋友功課多，測驗多，行唔開。
卓妮早前見過佢同小伏出席男小拔簡介會，唔知成功未？阿松好緊張話：「仲未呀，邊有咁快，仲要等second interview（第二次面試）。」