中環耳目：孫啟烈愛寧波湯圓夠油
工業總會主席孫啟烈（Cliff）係寧波人，要數天下間最惹味嘅佳餚，寧波菜同埋臨近嘅上海菜自然係佢心目中嘅No.1。佢幫襯寧波同鄉會餐廳同埋上海總會會所已經數十年，鍾意食肉絲炒年糕、寧波湯圓等。佢笑言自己食得好油膩，雖然唔健康，但勝在有濃郁家鄉味。
Cliff解開寧波湯圓好味之謎，原來係都市人敬而遠之嘅豬油。Cliff話，寧波湯圓嘅芝蔴餡係落豬油整拌，所以食落好香好滑。除咗響噹噹嘅寧波湯圓之外，Cliff又推介上海總會嘅火腿老雞魚唇湯、清蒸河鰻等淮陽名菜。
上海菜同寧波菜都係多油兼口味重，但若要求食物維持傳統風味，呢啲唔係咁健康嘅傳統秘技自然唔少得。好似寧波同鄉會餐廳嘅招牌好菜仲有鹹蛋黃炒蝦、年糕炒蟹，都係饕客嘅必食之選，但食完之後，梗要做多啲運動平衡吓啦！