中環出更：情迷香檳鄺英志呔酒合一
世界排名最高嘅華人品酒師鄺英志（Peter），多年來喺中港兩地教人品酒，自己又最鍾意咩酒呢？原來答案就喺佢條意大利Joan & David領呔上。
日前香港葡萄酒商會成立，卓妮見佢戴咗條香檳色領呔，呔面上滿布「J&D」字樣，驟眼望去，仲以為係一個個飲到倒瀉晒嘅酒杯，襯晒Peter日日摸杯底嘅身份。Peter笑稱，呢個係美麗嘅誤會，其實係招牌嚟嘅。不過，條呔閃閃生輝嘅香檳色，確實係隱藏咗Peter情迷香檳酒嘅秘密。
Peter原本從事飲食業，但自從鑽研品酒之後，佢嘅天分即刻顯露無遺，獲獎無數。一九九七年法國格蘭披治國際品酒師大賽，佢勇獲亞洲第二、世界排名十六，至今依然係世界排名最高嘅華人品酒師。
佢現任專職葡萄酒培訓及推廣嘅俊邦亞洲首席星級品酒師，多年嚟喺中港從事葡萄酒教育工作，最近獲剛成立嘅香港葡萄酒商會邀請出任教育及培訓事務委員會主席，果然實至名歸。