政情：法領事離任 留港做銀行家
轉眼結束五年任期嘅法國駐港澳總領事栢雅諾，於下月三十一日離任，好多人以為佢衣錦還鄉，返法國歎世界，但原來佢已被一間有法資背景嘅家族銀行羅致，將出任亞太區總部阿頭，十一月在港履新。
獲法資銀行羅致 領亞太總部
喺政商界長袖善舞嘅栢雅諾，經常出席大小文化藝術活動，同娛樂圈中人也非常稔熟，要數外國總領事，佢都算係風頭躉，難怪有大企業請佢做銀行家。聽聞間銀行係新公司，早前已喺巴黎設立總部，栢雅諾完成駐港總領事任期後，九月初飛去巴黎上班，為在港設立亞太區總部做準備。大假都唔放就返新工，睇黎佢學足香港人咁拚搏喎。
查實栢雅諾好享受港式生活，早前佢接受訪問時透露，喺香港可以買齊晒佢所需嘅法國產品，非常方便，如今如願留港發展，真係飲得杯落。據聞新任駐港領事九月一日上任，名叫Eric Berti，依家係法國駐悉尼嘅總領事，外交經驗有番咁上下，相信不難適應香港新工作。