政情：廿蚊張棄飲食業搞環保
飲食界立法會議員張宇人自今年三月就最低工資水平發表「廿蚊論」至今，外界鬧極唔完，連黨常委田北辰都同佢隔空罵戰，裏外不是人。記得廿蚊張當日發表完廿蚊論無耐，新鴻基地產非執董郭炳湘即刻出嚟同佢劃清界線，話廿蚊張言論不代表新地，事關佢係新地旗下香港世界貿易中心會副總經理。不過最新消息係，廿蚊張兩個月前已靜悄悄無做呢份工喇。
靜悄悄離開「新地」
廿蚊張過去一直喺銅鑼灣世貿會掛副總經理嘅名銜，但世貿會方面講過，廿蚊張實質上係擔任策略顧問工作。據講呢份工超筍，月薪高達二十萬元添。不過，根據立法會最新嘅議員個人利益申報紀錄，廿蚊張早於八月廿三日已更改咗「受薪工作及職位等」一欄嘅資料，由原來嘅世貿會副總經理改為「ASB Biodiesel（Hong Kong）Ltd顧問」，中文名為「奧地利環保公司」。換句話，佢已經無做世貿會份工。
為乜廿蚊張做做吓飲食業要轉行搞環保呢？莫非最低工資風波令佢意興闌珊？不過，睇真啲呢間奧地利環保公司嘅業務性質，其實同飲食業不無關係，因為係一間生物柴油廠，將廢棄食油循環再造提煉為車用柴油，每年產量可達十萬噸，生產咁多柴油，相信要向食肆大量收集廢棄食油，估計廿蚊張可以喺聯繫食肆方面擔當重要角色。我哋尋日聯絡過廿蚊張，但佢無回覆。
今次廿蚊張轉份環保工作，似乎同飲食界功能界別性質愈走愈遠，但喺呢個政治制度下都無乜所謂，因為現時部分功能界別議員本身職業同業界無乜關係。好似佢所屬嘅自由黨主席劉健儀做律師，但代表航運及交通界，謝偉俊本身都係律師，結果當選為旅遊界議員，所以廿蚊張幫手將廢棄食油循環再造成車用柴油，都叫做對飲食界有貢獻。
廿蚊張早前喺施政報告辯論中力撐大家樂扣除員工用膳時間人工，結果惹來工會發起罷食大家樂，該黨常委田北辰更同佢劃清界線。大家樂尋日終於屈服取消扣除員工用膳時間人工，暫時成功拆彈，但廿蚊張自己身上嘅最低工資炸彈，就唔知幾時先至拆得甩嘞！