中環出更：蔡李惠莉雙喜臨門笑不攏嘴

前日理大頒授榮譽博士畀蔡志明，蔡太做啦啦隊長，帶領仔女、女婿齊齊撐場。夜晚沙田馬場舉行保良局百週年紀念盃賽，蔡太身為保良局總理梗要現身支持。咁啱囡囡蔡加怡隻愛駒「萬能駒」喺尾場大熱勝出，獎金達七十九萬八千元。但囡囡冇嚟到，於是蔡太頂上拉頭馬，可謂全日笑到不停口。

施文信撞車入院

當日盃賽發生咗個小插曲，事關循例馬會主席要為盃賽頒獎，但係喺盃賽開跑之前，已經流傳馬會主席施文信發生車禍，最終佢真係失咗場。原來施文信傍晚喺大潭道撞車，仲入咗醫院，雖然唔係好嚴重，但趕不到嚟主持大局，後來由馬會大董周永健代勞。

周永健話，馬會咁大間機構，有齊晒機制應變突發事件，如果主席唔得閒，佢哋一班大董咪夾手夾腳搞掂佢囉！