中環出更：余錦基逛hmv買援交DVD
足球總會董事余錦基出名百足咁多爪，無論足球、賽車、選美、慈善等方面嘅活動都有佢嘅身影，閒時又懂得享受生活，好似佢間九龍塘豪宅經過幾年裝修後終於入伙，生活質素更上一層樓。雖然基哥近日忙於搬屋，但卓妮大前日下午四點半經過中環畢打街中建大廈時，就遇到基哥好悠閒喺hmv買完DVD影碟，然後行去置地廣場方向。
講述少女價值觀
基哥好支持環保，買咗幾隻影碟都無攞膠袋，只係用手揸住，無遮無掩，一路行一路window shopping，行到新加坡著名手袋品牌KWANPEN專門店時，佢駐足欣賞櫥窗啲手袋，莫非想買個靚手袋氹老婆？正當基哥睇到定晒型之際，卓妮發現佢買嘅其中一隻光碟，係一套講述援交少女經歷嘅港產片《囡囡》。
《囡囡》係透過四個來自唔同背景及年齡嘅少女援交經歷，喚醒社會關注少女援交問題，佢哋分別為買名牌、買禮物討好男友、寂寞難耐等原因去援交，反映年輕新一代「不理後果，想做就做」嘅思想態度。卓妮以前都有同基哥討論過年輕人問題，佢都有一套獨特見解，相信《囡囡》對佢有好大參考作用。
卓妮上前同基哥打招呼，佢話咁啱路過買幾隻碟，然後趕返公司做嘢。講到近況，基哥近排掛住湊孫無外遊，又話早前先至同囝囝余仲行去新加坡公幹，順道一遊環球影城。
其實卓妮周日喺馬場都見到基哥兩公婆，余太話目前正忙緊搬屋，有好多物件要執拾，仲讚基哥工作咁忙都抽時間執番自己啲嘢，唔使佢操勞喎！
卓妮