政情：立會足球賽隨時泡湯
休息一排之後，立法會足球隊終於再有比賽喇！佢哋聽日將會喺沙田運動場迎戰中國企業協會，呢次係足球隊今個立法年度首次比賽，唔知佢哋今次諗住數人、或者畀人數幾多粒呢？不過我哋收到個消息，呢場比賽隨時會踢唔成，到時都唔知點算。
身為立法會足球隊領隊嘅資訊科技界議員譚偉豪同我哋講，聽日立法會好多會開，部分足球隊鐵膽為咗出席會議，被迫放棄唔踢波，當中包括足球隊嘅鐵膽、民主黨李永達。高達係梁展文事件專責委員會嘅副主席，當日委員會安排咗個馬拉松會議，高達全日唔得閒，肯定唔使預佢踢。
除咗高達外，就連隊長工業界林大輝當日都因為要出席自己擔任召集人嘅「社區18」大型活動，而唔可以踢呢場比賽。據譚偉豪講，隊波依家湊夠腳，但佢對隊員可唔可以踢足全場都有啲擔心，而且如果到時又有人甩底，今年度首場波即時告吹，都咪話唔大吉利是。