中環出更：卿姐綠戰衣硬銷白鴿黨
民主黨以綠色為代表顏色，身為副主席嘅劉慧卿唔只經常高呼自由民主人權，就連着衫品味都同個黨襯到絕，係名副其實嘅「身體力行」。
戴廿蚊膠錶襯絕
卓妮尋日喺中環香港會門口撞到卿姐，佢一身綠色嘅打扮，遠遠已經睇見佢行過嚟。卿姐話，佢約咗財經事務及庫務局局長陳家強食飯，卿姐係立法會財務委員會主席，咁啱今日財經事務及庫務局有兩個項目交上財委，可能係傾呢樣嘢喇。
講番卿姐一身打扮，佢笑言綠色代表民主黨，所以咪着到成身綠色囉！不過除咗綠色，佢同樣都好鍾意黃色同紅色。睇真啲，卿姐連膠手錶都係綠色，真係夠晒誠意，需知綠色錶其實唔易搵，佢透露隻錶其實喺利源西街買嘅，價錢只係廿蚊，真係抵到爛。卿姐仲話，自己一次過買咗幾隻唔同色，方便第時襯衫喎。