政情：吳文華避政治自找麻煩

立法會乃係政治是非地，秘書處一向小心遠避政治，維持中立，但自從為議案準備參考資料新措施一出，外界就擔心秘書處難免被捲進政治漩渦。果然唔使等到明年「六四」、「七一」，十月復會後第二次辯論議案已經出事。

民主派議員下星期三動議辯論，要求釋放不久前獲諾貝爾和平獎嘅在囚內地異見分子劉曉波，秘書處尋日交畀議員嘅參考資料摘要，只有一頁紙共兩個段落，扼要敍述劉曉波去年底判刑結果，以及挪威諾貝爾評審委員會將和平獎頒予劉曉波，仲有中國外交部回應，全文五百字搞掂，對劉曉波入獄關鍵嘅《零八憲章》，卻隻字無提。

張文光揚言行管會追究

一頁Ａ４紙參考資料，到底係多定少，本來難以衡量，但一有比較，就好易成為眾矢之的。秘書處尋日亦就下星期三大會另一議案「制訂動物友善政策」提供參考資料，打開一睇，共四頁紙長，事件發展同相關資料都巨細無遺，連過去三年每年成功起訴涉嫌虐待動物案件宗數都搵埋。秘書處咁細心，本來好抵讚，不過，泛民議員就唔多欣賞嘞，仲開炮勁鬧添。

民主黨張文光質疑，秘書處見「釋放劉曉波」議案涉及政治，於是縛手縛腳，以聊勝於無嘅膚淺資料敷衍議員，揚言要喺行管會追究。社民連陳偉業亦話，秘書處呢一頁紙係對劉曉波嘅侮辱，令劉曉波「貓狗不如」，要秘書處上內會解畫。

秘書處接受查詢時就解釋，「釋放劉曉波」議案似乎唔屬政府政策範疇，所以只能提供概括背景資料，而參考資料嘅長短亦無規定，要視乎需要而定喎。唉！今次Pauline真係搬石頭砸自己腳，自找麻煩，就睇呢位立法會大內總管點拆彈啦！